LARUNBATEAN DANTZ POINT by BBK EGITASMOAK GERNIKA-LUMOKO PASILEKU PLAZA HARTUKO DU
LARUNBATEAN DANTZ POINT by BBK EGITASMOAK GERNIKA-LUMOKO PASILEKU PLAZA HARTUKO DU
Irailaren 7an, larunbatean, 18:00etatik 00:00etara Dantz Point by BBK ekimena Gernika-Lumoko Pasileku Plazan ospatuko da Txsk, Unzu eta Willy Kasper artisten musika elektronikoarekin.
Dantz Point proiektua 2019an jaio zen, musika elektroniko eta garaikideko performance artistiko eta sortzaileen bidez ondareari balioa emateko helburuarekin, eta orain, Bizkaiara iritsi da BBKren laguntzari esker. Aurreko astean Elorrion izan eta gero, oraingoan topalekua Gernika-Lumo izango da.
Doakoa izango den egitasmoak Pasileku Plaza hartuko du larunbatean 18:00etatik 00:00etara. Pasileku Plaza Gernika-Lumoko erdigunean kokatzen den plaza da. 1882an, Gernikako hiribilduaren eta Lumo elizatearen elkartze behartua gertatu zen, eta hori gogorarazteko, bi herrien artean Batasunaren plaza izeneko plaza berri bat eraiki zuten. Bestalde, haur hezkuntzako bi zentro zeudenez, plazaren atzeko horman Gerra Zibilean babesleku antiaereo bat egin zuten, zeina lur naturalean zulatu zen. Hortaz, batasuna eta babesa irudikatzen dituen plaza dugu honakoa, eta Dantz Pointaren bitartez, hori bera irudikatuko duen topalekuan bilakatuko da.
Programazioari dagokionez, Point-ak hiru artisten saioak izango ditu: Txsk, Willy Kasper eta Unzu. Hiruek Gernika-Lumok dituen elektronikari lotutako belaunaldi ezberdinak ordezkatuko dituzte, eta Point-aren bitartez, herriak duen elektronikaren eszena balioan jarriko da.
Ekimenaz aurrez aurre gozatzeko parada izateaz gain, Pasilekura gerturatzeko aukerarik ez duenak, 20:00etatik 21:30etara, EITBren Primeran plataformaren bitartez disfrutatu ahalko du saioa streaming bidez igorriko baita.
Dantz Point-aren sustatzailea “kultur marka eta proiektuen laborategia” da. 2017an sortu zen Euskal Herrian, eta dagoeneko erreferente bihurtu da musika elektronikoaren sektorean. Bere ekimenen artean, honako hauek nabarmentzen dira: Dantz Academy (aurrez aurreko eta online prestakuntzako zentroa) eta Dantz Festival (uztailean zortzigarren edizioa ospatu du Donostiako Tabakalera, Donostia Arena edo Miramongo Anfiteatroa bezalako egoitzetan).
Dantz Point-a Dantz-ek antolatuko du BBKren babesari esker eta Gernika-Lumoko Udalarekin elkarlanean.